Denne blide gjengen utgjer samfunnsutvalet i Haram kommune. F.v. Kathrine P. Beite, Øyvind Skjelten, Caroline K. Grønli, Ståle Grytten og Hilde B. Ellinsæter
Haram kommune
Det nyoppretta samfunnsutvalet i Haram kommune er no i gang med å involvere innbyggarane i arbeidet med kommuneplanen sin samfunnsdel, og dei vil ta i bruk også nettbaserte plattformer for å få innspel frå deg som bur og lever i Haram. Det er difor laga ei digital innbyggarundersøking, der vi ønsker at flest mogleg vil svare på kva som bør kjenneteikne Haram i framtida.
Kva skal til for at innbyggarane i kommunen vår skal oppleve at Haram er ein trygg og god plass å bu?
Det vil vil gjerne høyre di meining om, og i perioden 7. juni til 13. september 2024 kan du gi oss innspel rundt dette i den digitale undersøkinga vår.
Korleis delta i undersøkinga?
Undersøkinga kan svarast på både via pc og mobil. Du kan vere anonym, men vi treng å vite alderen din for å få svar på kva som er viktig for dei ulike aldersgruppene.
Du kan gå til undersøkinga ved å skanne qr-koden til høgre, eller ved å følge denne linken:
Svar på Haram kommune si innbyggarundersøking
Takk for bidraget ditt og svara dine!
Kva er kommuneplanen sin samfunnsdel?
Alle kommunar skal ha ein kommuneplan, denne skal ha ein samfunnsdel og ein arealdel. Arealdelen handlar om areala i kommunen og korleis vi disponerer dei. Samfunnsdelen skal vise hovudsatsingsområde, mål og strategiar for ønska utvikling av samfunnet vårt, og vere det overordna styringsdokumentet for alt vi gjer.
I Haram kommune har vi no begynt på utarbeidinga av ny samfunnsdel, og målet er at planen skal vere ferdig og vedtatt av kommunestyret løpet av første kvartal i 2025.
Kvifor vil vi høyre frå deg?
For å kunne lage ein god samfunnsplan med forankring også hos innbyggarane, er medverknad viktig. I mars vedtok Haram kommunestyre å sette ned eit samfunnsutval, som har til oppgåve er å sørge for nettopp det å involvere innbyggarar, foreldregrupper og næringsliv i arbeidet kommuneplanen sin samfunnsdel. Utvalet er tverrpolitisk og har fem medlemmar:
- Caroline Kjerstad Grønli - Fremskrittspartiet (leiar)
- Øyvind Skjelten - Arbeidarpartiet
- Kathrine Pernille Beite -Høgre
- Ståle Grytten - Industri- og Næringspartiet
- Hilde Beate Ellingsæter - Senterpartiet
Gjennom prosjektperioden har samfunnsutvalet og kommuneadministrasjonen gjennomført fleire medverknadsaktivitetar. Mellom anna har det blitt arrangert dialogmøte med både næringslivet og frivillige lag og organisasjonar i kommunen, i tillegg til politisk verkstad med Haram kommunestyre. Samfunnsutvalet og ordførar var også representert med stand under Myldredagane i Brattvåg i juni.
Til hausten skal det haldast workshop med både ungdomsrådet, eldrerådet og rådet for menneske med nedsett funksjonsevne. Samfunnsutvalet planlegg også deltaking med stand under HaNo-dagane i september, og deltaking i eit arrangement i Vatne Tennfjord-området. Meir informasjon vil kome.