I mai 2024 vart det lansert oppdaterte eigenberedskapsnivå, der dei største endringane samanlikna med råda som kom i 2018, er:
- Varigheit på eigenberedskapen aukar frå tre dagar til ei veke
- Meir detaljerte råd kring tema som kritisk medieforståelse og opphaldsstader under kriser
- Felles eigenberedskap og psykisk helse i kriser
I veke 44 kan du vinne ei beredskapsmatkasse om du deltar i konkurransen på tenestehuset!
Haram kommune
Utstilling og konkurranse på tenestehuset
I Haram kommune markerer vi Eigenberedskapsveka blant anna ved å ha utstilling på tenestehuset i Brattvåg. Utstillinga viser kva dei nasjonale råda anbefaler at du bør ha for å kunne klare deg i ei veke dersom ei krise skulle ramme. Utstillinga kjem også til å ha brosjyrar tilgjengeleg på både norsk og engelsk, utarbeida av Direktoratet for Samfunnssikkerheit og Beredskap (DSB). I tillegg vil det også vere mogleg å delta på ein konkurranse der ein kan vinne ei beredskapsmatkasse.
Informasjon på nettsidene og Facebook-sida til kommunen vil også vere ein viktig del av markeringa vår.
Brosjyre i posten
Eigenberedskapsveka 2024 startar måndag 28. oktober. I løpet av Eigenberedskapsveka vil alle landets husstandar få ei brosjyre i posten. Den inneheld viktig informasjon om kva du kan gjere for å førebu deg på kriser.
Norske myndigheiter tilrår at flest mogleg er førebudde på å klare seg sjølv i éi veke. I brosjyren får du konkrete råd om kva du kan gjere.
-Det er veldig viktig at innbyggarane våre er bevisst dette temaet, seier ordførar Vebjørn Krogsæter.
- Dersom det skulle oppstå ei krise der vi som kommune får utfordringar med å levere tenestene våre som normalt, er vi nødt å prioritere dei som ikkje greier seg sjølv først. I ein slik situasjon vil det bli avgjerande at dei som kan klare seg sjølve, er førebudd på det.
-Som ordførar oppfordrar eg difor alle innbyggarar til å lese brosjyren og styrke eigenberedskapen sin, avsluttar han.
Om eigenberedskapsråda
Eigenberedskapsråda som blir presentere i brosjyren, blei oppdaterte i 2024. Dei blei lansert på nettsida sikkerhverdag.no i mai.
Hensikta med råda er at ein skal vere i stand til å dekke dei mest grunnleggande behova i ein krisesituasjon: varme, lys, drikke, mat, legemiddel, førstehjelp, hygiene og informasjon.
Bakgrunnen for oppdaterte råd er ei forverra tryggleikspolitisk situasjon i Europa. Andre viktige drivkrefter er klimaendringar som fører til meir ekstremvêr, og samfunnet si avhengigheit av straum, vatn og mobilnett.
Her kan du lese meir om eigenberedskapsråda frå DSB