Ordførar Vebjørn Krogsæter tok imot den rumenske ambassadøren Cristian Bădescu (i midten) og konsul Per Erik Dalen (t.h.) på Haram tenestehus
Haram kommune
Ambassadøren var på besøk for å få ei orientering om kommunen.
Det er mange rumenarar som bur og arbeider her i Haram, som med godt kvalifisert arbeidskraft bidreg til viktig verdiskaping i det lokale næringslivet vårt. Dette var eit sjølvsagt tema i orienteringa og samtalane i etterkant.
Ambassadøren fekk også ei omvising på tenestehuset, både i fellesområdet ved biblioteket og i andre etasje der administrasjonen og fleire tenester har sitt daglege virke.
Fokus på tilrettelegging for val
I år er det val i Romania, og ambassadør Bădescu var oppteken av at rumenarar som er i vår region må motiverast til å stemme, både i dei lokale vala og valet til Europaparlamentet. Han poengterte viktigheita av at dei kunne tilrettelegge for at det skal vere enkelt å få stemme, og han ønskte ein dialog med kommunen om mellom anna vallokale.
Etter møtet på tenestehuset drog ambassadøren vidare til Vatne og Eidet kulturhall, der han skulle treffe landsmenn som bur i området.