Samordning av lokalt rus- og kriminalitetsførebyggande arbeid

SLT er ein samordningsmodell for lokale, førebyggande tiltak mot rus og kriminalitet. Målet med SLT er at barn og unge i Haram skal få rett hjelp til rett tid, av eit hjelpeapparat som samarbeider godt på tvers av tenester og faggrupper. 

Modellen skal sørge for å koordinere kunnskap og ressursar mellom politi og relevante kommunale tenester. Også næringsliv og frivillige organisasjonar høyrer med i dette nettverket. Arbeidet er forankra politisk og administrativt gjennom politiråd (øvste leiing i kommunen og politi). 

Gjennom arbeidet i SLT skal vi:

• Ha mest mogeleg oversikt over korleis barn og unge har det i Haram
• Sette i verk tiltak retta mot enkeltpersonar og/eller grupper
• Bruke rett tiltak til rett tid.
   

SLT- arbeidet er retta mot barn og unge frå 0-19 år. 

SLT-koordinator

For å ivareta formålet med samhandlingsmodellen, har kommunen ein SLT- koordinator som mellom anna skal: 

• Koordinere det kriminalitetsførebyggande arbeidet
• Vere bindeledd mellom politiråd, koordineringsgruppa (leiarar og personar frå tenester og organisasjonar med beslutningsmynde) og dei som jobbar direkte med barn og unge. 
• Bidra til at det blir sett felles mål og at tiltak vert gjennomført og evaluert. 

Når kan du kontakte SLT-koordinatoren?

Du er velkomen til å ta kontakt med kommunen sin SLT-koordinator om du til dømes

• Er bekymra for eit ungdomsmiljø på skulen din, på møtestader eller i nærmiljøet ditt.
• Ser utfordringar som gjeld fleire unge, som for eksempel rus, vald, tjuveri
• Er bekymra for hatytringar eller ekstreme miljø

Her kan du lese meir om SLT-modellen

Det er utarbeidd ein rettleiar til bruk ved bekymring for radikalisering og utvikling av valdeleg ekstremisme. Rettleiaren vart laga i Ålesund kommune i 2022, og er seinare tilpassa Haram kommune.

Dokumentet er meint for å gi informasjon om korleis ein kan møte, førebygge og følge opp radikalisering og valdeleg ekstremisme. Rettleiaren skildrar ei handlingsløype frå bekymring til handling, frå dei lokale og relativt enkle tiltaka, til tyngre innsats i tverrfagleg samarbeid med relevante aktørarar. Den skal gjere det enklare å gje rask respons når utfordringar oppstår. 

Målgruppe

Målgruppa er tilsette i skulen, barnevernet, politiet,  helsevesenet, kultur og fritid m.m. Rettleiaren rettar seg primært mot aktørar i førstelina, men også sivilsamfunnet. Det kan vere føresette, familiemedlemmar, vener, naboar, kollegaer og/eller nokon i foreiningar, meiningheten eller fritidsarenaen som er bekymra for aukande grad av radikalisering hos eit barn eller ein ungdom/ vaksen. 

Kva gjer eg ved bekymring?

Dersom du er bekymra for at ein person er i ein radikaliseringsprosess, er det ei rekke ressursar og instansar du kan støtte deg til i kommunen og hos lokalt politi. Det skal vere ein låg terskel for varsling ved bekymring. I rettleiaren finn du forslag til handtering, både som privatperson og som tilsett.

Gå til rettleiar ved bekymring for radikalisering og utvikling av valdeleg ekstremisme (PDF, 847 kB)