Dele frå eigedom

Det er eigar/heimelshavar av eigedomen som kan søke om frådeling. Er det fleire eigarar, så må alle eigarane signere søknaden. Alternativt kan person med fullmakt frå grunneigarane signere søknaden.  Fullstendig liste over dei som kan søke finn du i matrikkellova § 9 .  

Søknadsprosessen ved ei deling av eigedom består av to trinn: 

Først skal saka behandlast av byggjesakavdelinga etter plan- og bygningslova. 

Saka blir behandla vidare av oppmålingsavdelinga. 

Blir det søkt om frådeling av ein landbrukseigedom, må søknaden også behandlast av landbruksstyresmaktene i samsvar med Jordlova § 12. Dette blir gjort etter at bygningsstyresmaktene har gjort sitt vedtak.   

1.  Send inn søknad

Lever søknad om frådeling og rekvisisjon av oppmålingsforretning til byggjesakavdelinga. Begge skjema må leverast inn. Vi tilrår at du søkjer digitalt 

Søknad om tillatelse til fradeling (nynorsk) 

Rekvisisjon av oppmålingsforretning 

Vedlegg som må følgje søknaden: 

Situasjonskart som viser arealet som blir ønskt frådelt. Målsett aktuelt areal på situasjonskartet så nøyaktig som råd. Tilkomst til tomta og vatn- og avløpsleidningar må teiknast inn.  

Tiltaket må nabovarslast. Opplysningar gitt i nabovarsel og kvittering for nabovarsel må sendast inn.   

Krevst det dispensasjon må dette også søkjast om. 

Dokumentasjon på tilknyting til offentleg veg, vatn, og avløp. Dersom det er private anlegg/over privat grunn må det liggje føre løyve frå grunneigar. Ved avkøyring til offentleg veg er det behov for avkøyringsløyve frå ramma vegstyresmakt. Ved privat avløp må det liggje føre utsleppsløyve.

Eventuell annan relevant dokumentasjon, t.d. dokumentasjon på trygg byggjegrunn. 
 

2.  Vedtak

Søknaden blir behandla av ein saksbehandlar etter plan- og bygningslova. Behandlingstida for slike søknader er på inntil 12 veker, med mindre søknaden oppfyller vilkåra for tre vekers saksbehandlingstid i plan- og bygningslovas § 21-7 tredje ledd. 

Du vil vidare få faktura for saksbehandlinga av søknaden. Her finn du gebyr for saksbehandling.

Om løyve blir gitt får oppmålingsavdelinga melding om dette og vil ta saka vidare. 

Kommunen sender ut varsel om oppmålingsforretning minst 14 dager før oppmålingsforretninga blir halde.

Ei oppmålingsforretning går ut på å klarleggje og beskrive grenser og rettar i tråd med påstandane til partane og framlagde dokument, og elles bringe fram opplysningar og dokumentasjon som er nødvendig for matrikkelføring og eventuelt tinglysing.

Ved ei eigedomsdeling blir ein del (parsell) av ein eigedom avmerkt, oppmålt, beskrive i eit matrikkelbrev og gitt ein eigen matrikkelnemning (gards- og bruksnummer). Det blir sendt ei utskrift av matrikkelen til eigar og partane det vedkjem som dokumentasjon.  

 Du vil få faktura frå oppmålingsavdelinga. Kva kostar det? Her finn du gebyra for oppmåling.