Klage på den pedagogiske verksemda i barnehagen

Som lokal barnehagemyndigheit skal kommunen rettleie og sørge for at alle barnehagane i Haram blir drivne i samsvar med gjeldande regelverk (jfr. barnehageloven § 10).

Lova pålegg kommunen å føre tilsyn med barnehagane i kommunen (jfr. barnehageloven §  53 om tilsyn med barnehagane), og kommunen kan pålegge barnehagane å rette uforsvarlege eller ulovlege forhold.

Samfunnsmandatet til barnehagen er regulert gjennom Lov om barnehagar (barnehageloven) med forskrifter.  Forskrift om Rammeplan for barnehagen fastset utfyllande føresegner om innhald og oppgåvene til barnehagen.

Gjeld klagen/bekymringa forhold som omhandlar helsa, miljøet og tryggleiken til barna, må du ta kontakt med Miljøretta helsevern.

Du bør som hovudregel ta opp bekymringa eller klaga med pedagogisk leiar eller styrer, før du eventuelt sender ho til barnehagemyndigheita Å løyse ei sak på lågast mogleg nivå er formålstenleg for alle involverte partar.  

Du kan også ta opp generelle problemstillingar i samarbeidsutvalet til barnehagen (SU).  

Dersom dette ikkje løyser problemstillinga, kan du kontakte barnehagemyndigheita. 

Samarbeid mellom barnehage og heim eller andre samarbeidspartar, det pedagogiske innhaldet og eit utrygt barnehagemiljø.

Her er nokre døme på tema som kan vere bakgrunn for klage:

• uheldig samspel mellom barn 
• barn som over tid ikkje deltek i leik 
• vanskeleg samarbeid med barnehagen 
• manglande informasjon om barnet ditt 
• manglande pedagogisk innhald 
• barn sitt manglande høve til å påverke barnehagekvardagen sin 
• lite utfordrande og stimulerande leike- og læringsmiljø både ute og inne 
• stor utskifting av personalet over tid

Det er oppgåva til barnehagen å vareta alle barns behov for omsorg, leik, læring og danning i samarbeid med heimen til barnet. Personalet i barnehagen skal møte barn og foreldre med tillit og respekt. Personalet skal bidra til trivsel og glede i leik og læring, og barnehagen skal vere ein utfordrande og trygg stad for vennskap og felleskap. 

Du kan klage eller sende ei bekymringsmelding ved å sende elektronisk skjema som du finn på denne sida.

Innhaldet i bekymringsmeldinga blir formidla til barnehagen når barnehagemyndigheita undersøker saka.  

Ønsker du at namn og opplysningar blir anonymiserte, må du skrive dette tydeleg i bekymringsmeldinga.  

E-postar kan ikkje innehalde personopplysningar. Bruk derfor klageskjemaet på denne sida.

Har du spørsmål til utfylling av klageskjemaet, send ein e-post til:  postmottak@haram.kommune.no 

Når barnehagmyndigheita får klagen, vurderer vi først om innhaldet er omfatta av barnehageloven med forskrifter. Saksgangen følger prinsippa i forvaltningslova.

Dersom klagen di inneheld teiepliktige opplysningar, vil saka får fritak frå offentleg innsyn. Dette hindrar ikkje at saka kan kome i media, men all sensitiv informasjon blir fjerna.  

Vurderer barnehagemyndigheita å føre tilsyn, har barnehagen som part i saka rett til å bli gjort kjend med innhaldet i klagen. Etter tilsynet får barnehagen ein rapport. Avdekker barnehagemyndigheita brot på barnehageloven og forskrifter, vil barnehagen få varsel om pålegg om retting. Du som klagar vil bli orientert om utfallet i saka.