Kommuneoverlege Maiken Talsæte fortel at det er auka forekomst av influensa i regionen vår, og at vi no bør ta nokre forholdsreglar for å unngå spreiing av smitte.
Maiken Talsæte er kommuneoverlege i HaramVaksinasjon er avgjerande
– Det er særleg viktig at uvaksinerte eldre, personar i risikogruppene og tilsette i helsevesenet vaksinerer seg så snart som råd, understrekar ho. - I tillegg til influensa er det fleire andre luftvegsvirus i omløp, mellom anna covid-19. Personar over 75 år og dei som tilhøyrer risikogruppene blir derfor oppmoda til å ta oppfriskingsvaksine.
Råd ved symptom
Har du symptom på luftvegssjukdom, i form av hoste, tett eller rennande nase eller sår hals, bør du unngå unødvendig nærkontakt med personar som kan bli alvorleg sjuke av luftvegsinfeksjonar. Dette gjeld særleg spedbarn, eldre og personar med kroniske sjukdommar.
Kommuneoverlegen minner om gode hostevanar: - Host i albogen eller i eit papirlommetørkle som du kastar etter bruk, og vask hendene ofte med såpe og vatn. Dette kan redusere spreiinga av smitte.
Når bør du kontakte lege?
Dei fleste som får luftvegsinfeksjonar blir friske av seg sjølve. Men dersom du er bekymra for eiga helse eller for barnet ditt, bør du ta kontakt med fastlegen for undersøking.
Tilhøyrer du ei risikogruppe er det viktigaste du kan gjere å ta vaksine mot influensa, covid-19 og pneumokokk (lungebetennelse).
Kommuneoverlegen råder også til å vurdere bruk av munnbind og å halde avstand til andre i periodar med mykje smitte.
- Dette kan vere med på å beskytte både deg sjølv og dei mest sårbare i samfunnet, avsluttar ho.
Her kan du lese FHI sine smittevernråd