Søk kommunal bustad

Du må vere utan eigna bustad og ikkje i stand til å skaffe deg bustad sjølv, eller med hjelp frå andre. Det må vere økonomiske, helsemessige eller sosiale forhold som gjer at du ikkje meistrar å skaffe deg ein plass å bu. Det at du har lav inntekt er ikkje alltid nok til å få kommunal bustad.

Ved behandling av søknadar og tildeling av kommunale utleigebustadar vert det lagt vekt på:

• Inntekts - og formueforhold:
  Søkar må ikkje ha inntekt, formue eller alternative moglegheiter som gjer søkar i stand til sjølv å skaffe eigna bustad med mindre det er særlege grunnar til det.
• Andre bustadverkemiddel:
  Søkar som kan nyttegjere seg av andre bustadverkemiddel for å skaffe eller behalde bustad, skal ikkje innvilgast kommunal bustad.
• Alder:
  Søkar må vere over 18 år. Det kan gjerast unntak i særskilde tilfelle.
• Butid:
  Søkar skal ha ei samanhengande folkeregistrert butid i kommunen dei siste to åra med mindre særlege grunnar føreligg. Utanlandske statsborgarar må i tillegg ha lovleg opphald i landet. Det blir ikkje stilt krav om butid for flyktningar som vert førstegongsbusett i kommunen.
• Noverande buforhold:
  Søkar må vere utan fast eller eigna bustad, eller vere i ferd med å miste bustaden sin.
• Helsemessige- og sosiale forhold:
  Helsemessige- og sosiale forhold blir vektlagt ved behandling av søknaden. Søkarar som har omfattande bistand frå hjelpeapparatet kan tildelast bustad, dersom bustaden har betyding for eit heilskapleg tilbod og når annan bustadbistand ikkje er aktuelt.
• Misleghald:
  Dersom bustadsøkar har misleghaldt leigeforhold med kommunen eller misleghaldt lån frå kommunen, kan søknaden bli avslått. Det er krav om at husleigerestanse og anna gjeld knytt til kommunale buforhold skal vere gjort opp.
• Oppfølgingsbehov:
  Søkarar som er vurdert til å ha oppfølgingsbehov i bustaden for å meistre busituasjonen, kan berre tildelast bustad dersom søkaren går inn i eit forpliktande samarbeid med kommunen.
• Tidligare tilbod:
  Dersom søkar ikkje har tatt imot tidligare butilbod eller anna bustadhjelp som kommunen finn eigna, kan søknaden bli avslått.

Fortløpande vurdering

Alle søknadar blir vurdert fortløpande.

• Søknadar som manglar dokumentasjon får brev om å oppdatere søknad/ettersende dokumentasjon.
• Søknadar som er innanfor kriteria for kommunal bustad får beskjed om at dei er på ei «godkjentliste». Avhengig av tilgjengelege bustader og prioritering blant godkjente søkarar, vil ein kunne få tildelt ein bustad.

Tildeling av bustad

Tildeling vil skje når det er ein eigna bustad tilgjengeleg, søkar vil då bli kontakta på telefon og i brevsform.

Visning og kontrakt

Dei som har fått tildelingsbrev får beskjed om å kontakt Hararam kommune for visning. Om bustaden er aktuell må eventuell NAV-garanti skaffast, om dette er etterspurt i tildelingsbrevet. Kontraktsmøte blir avtalt, der kontrakt med 3 års varigheit blir signert. Bustad med nøklar blir òg overlevert på kontraktsmøtet.